شروط الاستخدام
آخر تحديث: ٢٩ تشرين الأول ٢٠٢٦
هالصفحة بتشرح شو بتاخد لما تشتري الكورس، وشو المتوقّع منك. كتبناها بلغة واضحة عن قصد — لو في شي مش مفهوم، اسألني وبجاوبك.
مين وراء الكورس
الكورس من إعداد وتقديم أمير موسى (Ameer Musa)، مصلحة فردية بتشتغل تحت اسم AMEER AI. البيع والدفع بيتمّوا عن طريق Dodo Payments Inc، البائع الرسمي (Merchant of Record). الموقع: course.ameerli.com، والتواصل: ameer@ameerli.com.
مين البائع الرسمي
Dodo Payments Inc هي البائع الرسمي (Merchant of Record) لهذا المنتج، وهي اللي بتعالج الدفع وبتتولّى الضرائب والفواتير.
يعني عملياً: العقد الشرائي بينك وبين Dodo Payments، والفاتورة بتيجيك منها، وكشف حسابك البنكي رح يعرض اسمها مش اسمي. أنا بقدّم المحتوى والدعم.
اشتريت قبل هيك عبر Paddle؟ البائع الرسمي لشرائك بيضل Paddle.com Market Ltd، وأي استرجاع إله بينعالج عبرها. بالعموم: البائع الرسمي لأي شراء هو اللي اسمه على الفاتورة اللي وصلتك.
شو بتاخد بالضبط
- كورس فيديو رقمي بالعربي عن صناعة الفيديوهات بالذكاء الاصطناعي.
- وصول مدى الحياة للدروس المنشورة، وللي بينضاف عليها لاحقاً بنفس الكورس.
- السعر الأساسي 250 دولار أمريكي، دفعة واحدة — مش اشتراك، وما في تجديد تلقائي ولا رسوم متكرّرة.
- ببعض الدول السعر ثابت بعملة البلد (مثلاً ₪799 بالشيكل، أو 969 ر.س بالسعودية). العملة حسب بلد الفوترة اللي بتختاره بصفحة الدفع، والمبلغ اللي بيبيّن هناك هو اللي بتدفعه بالزبط.
- أحياناً بنطرح عروض مؤقتة بسعر أقل. السعر اللي بتشوفه وقت الشراء هو اللي بينطبق، وهو اللي بتشوفه بالفاتورة اللي بتوصلك.
- التسليم فوري بعد نجاح الدفع: بينفتح وصولك على طول، والدروس بتنفتح بالترتيب، وبيوصلك إيميل فيه رابط الدخول.
حسابك إلك أنت
الدخول مربوط بإيميلك. ممنوع تشارك حسابك أو كود الدخول أو رابط الدخول مع حدا تاني، وممنوع تنزّل الدروس أو تعيد نشرها أو تبيعها أو تعرضها بمكان تاني.
لو صار استعمال مشترك واضح للحساب، بقدر أوقف الوصول. بهالحالة بتواصل معك أول، وما بوقف شي بلا ما أفهم شو صار.
المحتوى ملكي
كل الفيديوهات والملفات والنصوص بالكورس ملك لأمير موسى. شراء الكورس بيعطيك حق مشاهدة شخصية — مش حق ملكية ولا حق إعادة توزيع.
اللي بتصنعه أنت بالأدوات اللي بتتعلمها بالكورس — إلك أنت بالكامل. ما إلي أي حق فيه.
الاستعمال المسموح
الكورس بيعلّمك تصنع صور وفيديوهات بالذكاء الاصطناعي. اللي بتصنعه مسؤوليتك إنت، وبشروط:
- ممنوع تستعمل وجه أو صوت أي شخص حقيقي بلا موافقته الصريحة. استعمل صورك وصوتك إنت، أو شخصيات خيالية، أو ناس وافقوا بشكل صريح.
- ممنوع انتحال شخصية — ولا تقديم محتوى كأنه صادر عن شخص حقيقي وهو مش صادر عنه.
- ممنوع محتوى مضلّل أو جنسي أو مؤذي — بما فيه الأخبار المفبركة، والاحتيال، والتحرّش، والتشهير.
المخالف بينسحب وصوله للكورس بلا استرجاع.
شو ما بوعدك فيه
الكورس بيعلّمك مهارة وأدوات. ما بضمنلك نتيجة معيّنة: لا دخل، ولا عدد متابعين، ولا عملاء. النتيجة بتعتمد على شغلك أنت.
الأدوات اللي بنستعملها بالكورس (مثل Higgsfield وClaude) خدمات طرف ثالث مستقلة عني. أسعارها وميزاتها وسياساتها بتتغيّر بلا رجوع إلي، وبعضها بيحتاج اشتراك مدفوع منفصل عن سعر الكورس. ما بتحمّل مسؤولية تغيّرها أو توقّفها.
الكورس بيتحدّث
بضيف دروس وبحدّث القديمة لما الأدوات تتغيّر. التحديثات بتوصلك بلا رسوم إضافية. وبقدر أعدّل ترتيب الدروس أو أدمجها أو أشيل درس صار قديم — الفكرة إن الكورس يضل شغّال، مش إنه يضل نفسه.
الاسترجاع
في سياسة استرجاع واضحة بصفحة منفصلة: سياسة الاسترجاع.
الاسترجاع مرة واحدة لكل شخص. لو تبيّن إن نفس الشخص قدّم استرجاعاً سابقاً بإيميل آخر، بنحتفظ بحق رفض طلب الاسترجاع الثاني.
الخصوصية
شو بنجمع وشو ما بنجمعه، ومين الأطراف اللي بتوصلها بياناتك — كله مشروح بـ سياسة الخصوصية.
تعديل الشروط
لو عدّلت هالشروط، بحدّث تاريخ «آخر تحديث» فوق. التعديلات بتسري على المشتريات الجديدة. لو التعديل بيأثر على وصولك الحالي، بخبّرك بالإيميل.
أسئلة
اكتبلي على ameer@ameerli.com — أي سؤال عن الشروط أو الكورس أو الدفع.